Walang katarungan sa ilalim ng rehimeng Arroyo

Ginunita sa iba’t ibang panig ng bansa nitong Disyembre 10 ang Pandaigdigang Araw ng Karapatang-tao.

Maynila-- Ipinahayag ng mahigit 2,000 katao ang kanilang damdamin laban sa mga paglabag sa karapatang-tao sa mga plakard at istrimer nila. May mga nagsuot ng mga maskarang may tig-iisang letrang bumubuo ng salitang “hustisya.”

Ilang metro bago ang Malacañang ay hinarang sila ng mga pulis na may suportang dalawang trak ng bumbero. Itinuloy ng mga nagmamartsa ang kanilang programa sa Morayta St. sa Sampaloc.

Ani Rep. Teodoro Casiño ng Bayan Muna, isa sa mga nagtalumpati sa rali, hindi kailanman makakamtan ng mamamayang Pilipino ang minimithing katarungan habang nasa kapangyarihan ang rehimeng Arroyo. Ayon naman kay Marie Hilao-Enriquez ng Karapatan, makakamtan lamang ang katarungan kung ang kasalukuyang administrasyon ay matatanggal sa poder.

Naglunsad rin ng mga martsa at rali sa ibang bahagi ng bansa tulad ng Negros, Panay, Cebu City at Davao City. Ang maikling lakbayan ng Kilusang Magbubukid ng Pilipinas (KMP)-Negros ay sinalihan ng 1,500 mula sa mga alyadong organisasyon sa ilalim ng BAYAN. Binasa sa pagtitipon sa plasa ng Bacolod City ang isang mensahe mula kay Kasamang Luis Jalandoni, tubong-Negros na tagapangulo ng NDFP Peace Negotiating Panel. Hinikayat ni Jalandoni ang pagkilos at pag-oorganisa ng libu-libong mamamayan para makapag-ipon sila ng lakas upang maipagtanggol at ipaglaban ang karapatang-tao.

Sa Panay, nagmartsa rin ang 3,600 aktibista sa Iloilo City, sa Roxas City, Capiz at sa Kalibo, Aklan. Tinuligsa nila ang kontra-rebolusyonaryong patakaran ng gubyerno na siyang sanhi ng nagpapatuloy na mga pampulitikang pamamaslang at pagdukot sa mga aktibista. Sa Cebu City at Davao, pinamunuan ng BAYAN at Bayan Muna ang mga kilos-protesta.

Sa Mindanao, nilagdaan nina Bishop Delfin Callao ng Iglesia Filipina Independiente, Ustadz Mohammad Tee, Ustadz Wilson Miranda at Amirah Ali-Lidasan ng Suara Bangsamoro Party at iba pang alyadong organisasyon ang isang pahayag na bumabatikos sa “all-out war” ng rehimeng US-Arroyo laban sa mga rebolusyonaryong pwersa at mga pinagsususpetsahang base nila. Anila, sa tabing ng mga programang “counter-terrorism” at “counterinsurgency,” ginagawang target ng mga operasyong istrayk, saywar at gawaing paniniktik ang mga sibilyang komunidad ng Kristyano, Moro at Lumad.

Ipinahayag naman ni Archbishop Angel Lagdameo, presidente ng Catholic Bishops Conference of the Philippines (CBCP) na mahihirapan, kundi man imposibleng makuha ng gubyernong Arroyo ang tiwala at respeto ng publiko dahil sa talamak na rekord nito sa pang-aabuso sa karapatang-tao

*****************