Pesante-USA Thursday, Oct. 12, 2006 at 1:55 AM

magsasakapil@hotmail.com

213-241-0906 337 Glendale Ave.

Los Angeles, CA 90026

***********

ARROYO AT MARCOS, PAREHONG PASISTA, PAHIRAP SA MASA-- PESANTE-USA

Los Angeles—Ubod ng Walanghiya!

Para sa Pesante-USA, ano pa bang salita ang higit na makakapaglarawan sa itsura ng rehimeng US-Arroyo sa mata ng sambayanang Pilipino ditto sa Amerika at maging sa Pilipinas?

Kung mamakapatay lamang ang mga salita at ang galit, matagal nang natunaw tulad ng asin ang rehimeng kinamumuhian ng mamamayan.

Hindi maiwasan ng Pesante-USA na nagtataguyod ng karapatang pantao, usaping pangmagsasaka at pangkalikasan sa Pilipinas na itinatag noong 1992 sa Amerika na ihambing ang ilang pagkakatulad ng dalawang rehimeng:

• Katulad ng pasistang rehimeng Marcos na nagsikap na ibintang ang pagpatay kay Senador Benigno Aquino Jr noong Agosto 21, 1983 kay Rolando Galman na isang “fall guy”, ang pulisya at military ni Arroyo ay namimilipit na gustong palabasin na "simpleng kaso ng pagnanakaw" ang pagpatay kay Obispo Alberto Ramento sa Tarlac na tunay na nakapangigilabot at sukdulang pagtampalasan sa mga alagad ng simbahan!

• Tulad ni Marcos na nagpapatay ng mga abogado tulad nina Alex Orcullo ng Davao City at mga kilalang opisyal ng bayan tulad nina Gobernador Jose Lingad ng Pampanga, Cezar Climaco ng Zamboanga atbp, si Arroyo ay nagligpit sa mga abogadong tulad ni Jovy Magsino ng Mindoro, at ang chief security Glean ni Mayor Binay sa kanyang lantarang kampanya ng pananakot.

• Tulad ni Marcos na nagtawag ng Agrava Komisyon na nagpawalang sala kay Heneral Fabian Ver noong 1984 , Si Arroyo ay may Melo Commission na nakipagmoro-moro kay Heneral Esperon ng AFP at Jovito Palparan at malamang tutulad sa sarswelang ni Marcos na magpapawalang sala sa mga nabanggit sa di malayong hinaharap.

• Tulad ni Marcos na ang dayaan sa bar examinations ay kabi-kabila dahil ang kasabwat ay mismong mga mahistrado ng Korte Suprema, sa panahon ni Arroyo ang dayaan sa nurses examination ay tulad ng “laban o bawi” na naging “retake o hindi..”

• Kung si Marcos ay may eskandalo sa dispalinghadong Bataan Nuclear Plant (BNP) na tinakbuhan ni Herminio Disini, si GMA ay mga eskandalo sa PIATCO at sa COMELEC automated machines na pinawalang sala ng Ombudsman na hinirang ni GMA- si Merceditas Gutierrez na mayabang pang nagsabi “ na hindi ako mabibili ninuman kahit ng Malacanang” pero pinawalang sala at nagsabing “walang krimen” o walang nagnakaw sa bilyung-bilyong perang kinurakot sa masa ng sambayanan.

• Kung si Marcos ay nandaya sa eleksyon na binulgar ni Enrile noong 1986, si Arroyo ay may nabulgar ding nandaya sa mga phone records nila ni Garci at nagsorry pa sa madla pero nagmatigas na mangunyapit sa kapangyarihan tulad ni Marcos.

• Tulad ni Marcos na minaster ang pandaraya sa eleksyon at naglagay ng mga tao sa COMELEC tulad ni Perez na tulad niyang nuno sa dunong sa pandaraya, may Abalos at Garcillano si Arroyo na magaling na magmanipula ng eleksyon at matapang pang magmamalaking” walang dayaan sa eleksyong 2004.”

• Kung si Marcos ay nambomba para maideklara ang martial law sa Plaza Miranda at sa Maynila, ang mga bataan ni Arroyo ay abala sa pasabog na bininintang sa MILF, sa Jamaiya-Islamiya, sa mga rebeldeng militar at sa NPA liban nga lamang sa kanila.

• Ginamit ni Marcos ang Tripoli Agreement ng 1976 at ang negosasyon sa kapayapaan para wasakin ang MNLF, si Arroyo ngayon ay nagmamaniobra para gawin ito laban sa MILF. Masahol pa tulad ni Marcos sinuspinde nito ang usapang sa pagitan ng NDFP at ng gobyerno.

Paano maasahang susunod sa batas ang mga mamamayan kung nakikita nilang ang mismong president ay di marunong sumunod sa batas, binabaluktot ang batas at mistulang diktador na nagmamando at ubod ng taray sa pagiging aristokrata at despotikong kasike !

Ang nakakapagngangalit, pinapawalang sala pa ng rehimeng Arroyo ang buwitreng si Imelda Marcos at ang kanyang mga alipures habang inaalipusta pa ang mga biktima ng pasismo sa pagnanakaw ng perang dapat mapunta sa kanila. Kasabay ito ng pinag-ibayong pasismo at terorismo sa pagpatay at panunupil sa masa katulad ng walang awang pagpatay kay Obispo Ramento at 765 iba pang biktima!

Humahabol at malamang nais pang higitan ni Arroyo si Marcos sa pagkatuta sa Imperyalismong US at sa pagiging pasista. Ngunit pareho silang nagmalabis at puminsala sa masa at sa huli sila ay kakalusin din ng masa. Wala silang kauuwian kundi kung saan sila nababagay- sa kangkungan ng kasaysayan!

*********