Press Release

Reference: Andreb Asido, 09068942223

Spokesperson, PAMARIL-Manila

MEGA PROJECTS NI GLORIA, MEGA DEMOLISYON SA MGA MARALITA



Manila-- "MEGA DEMOLISYON at MEGA DISLOKASYON para sa mga maralita at mamamayang Pilipino ang hatid ng mga pangakong MEGA PROJECTS ni Gng. Arroyo na naging pokus ng pangako para sa "kaunlaran" noong inilahad nito ang bersyon ng State of the Nation Address." Ito ang sinabi ni Carmen "Nanay Mameng" Deunida, pambansang tagapangulo ng Kalipunan ng Damayang Mahihirap (KADAMAY).

Sa idiniin na pokus ng programa ni Gng. Arroyo, siguradong daan-daang libong mga maralita at mamamayan ang direktang maapektuhan ng demolisyon at dislokasyon kung sakaling ipatupad ang mga proyektong pang-imprakstraktura, mga bagong kalsada, tulay, modernisasyon ng mga daungan, paliparan at tren. Higit pa rito ay dahil sa kawalan ng pondo ng administrasyon Arroyo para sa lahat ng proyektong nabanggit, siguradong ang paraan ng pagpapatupad ng mga ito ay sa pamamagitan muli ng pribatisasyon, kung saan nakaasa sa dayuhang pautang at pamumuhunan. Katulad ng naganap sa Philippine National Railways and Modernization Project (PNR MRP) at sa Northrail-Southrail Linkage Project (NSLP) na mula sa mga dayuhang pautang na may malaking interes nagmula ang mga pondo.

"Bago mangarap si Gng. Arroyo ng mga Mega Projects niya, kinakailangang tuunan muna ng masusing pansin ang kinahinatnan ng mga maralitang itinaboy sa tabing-riles sa kahabaan ng Bulakan bunga ng PNR MRP, at sa kasalukuyang kinakaharap ng mga nademolish na maralita sa kahabaan ng San Andres at Paco, Manila sa kanilang relokasyon sa Cabuyao, Laguna, " mariing sinabi ni Andreb Asido, tagapagsalita ng Pagkakaisa ng mga Mamayan sa Riles (Pamaril-Manila).



"Walang kuryente, tubig, malayo sa mga trabaho, kabuhayan at eskuwelahan. Hirap na hirap ang buhay ng mga maralitang galing sa tabing-riles sa relokasyon," dagdag pa ni Asido.

Pagkatapos ng SONA ni Gloria, nagtitipon-tipon ang mga maralitang naninirahan sa tabing-riles sa kahabaan ng Maynila ngayong araw sa Polythecnic University of the Philippines (PUP), Unyon ng Mag-aaral Building. Aabot sa 50 lider ng maralita ang dumalo at nagbahagi ng kani-kanilang mga kalagayan sa kahabaan ng riles sa lungsod ng Maynila.

Sa lahat ng mga proyektong pangkaunlaran, ang mga maralita ang nabibiktima ng pamahalaan. Sa kahabaan ng Maynila, may pitong barangay na ang dinemolish, ang isa pa rito, ang Barangay 825, ay buung-buong ibinura sa mapa ng NSLP. Sa kabuuan, aabot na sa 4,000 pamilya ang nademolish. May iniwang 10 pamilyang naging kabilang na sa homeless mula sa Brgy.825, dahil sa mga uncensus at hindi naikabilang sa relokasyon ng NHA. Ang susunod na nakaambang mademolish ay ang mga komunidad sa Pandacan at Sta. Mesa, Manila. Itinatayang kalahati ng mga naninirahan dito ay kabilang sa mga uncensus kung kaya't mga kandidato na ring maging homeless dahil hindi sila kasama sa relokasyon ng NHA.

Samantala, nanawagan si Asido sa mga maralitang mabibiktima ng NSLP, na huwag pumaloob sa mapanlinlang na iskema ng NHA na "voluntary demolition" . Itinutulak ng ahensya na magkusang idemolish ng mga maralita ang kanilang tahanan upang makasiguro sila ng lote sa relocation site. "Tuso ang iskemang ito dahil nangangako ng magandang kinabukasan sa relokasyon, subalit kagutuman at kamatayan lamang ang ihahatid nito sa ating maralita," dagdag ni Asido.

"MEGA PAGLABAN! Iyan ang nagkakaisang tugon ng maralita sa mga anti-maralita, anti-mamamayan at anti-nasyunal na mga proyekto ni Arroyo katulad ng Northrail-Southrail Linkage Project, " Ani ni Deunida. "Sa sama-samang pagkilos ng mamamayan lamang maipagtatanggol ang karapatan sa paninirahan at karapatang mabuhay ng mga maralita." #