3,000 lumikas sa Surigao

3,000 lumikas sa Surigao

Los Angeles- Napagalaman ngayon ng AJLPP na lumulubha ang mga paglabag sa karapatang pantao sa Mindanao lalong lalo na sa mga probnsya ng Surigao at Davao.

Umaabot na sa halos 3,000 magsasaka an lumikas mula sa 12 komunidad ng Surigao de Sur habang nagpapatuloy ang mga operasyon militar ng mga pwersa ng Eastern Mindanao Comman laban sa Bagong Hukbong Bayan

Ayon sa Karapatan-Surigao del Sur Chapter, aabutan na ng Pasko ang mga bakwit sa mga sentro ng ebakwasyon dahil sa mga operasyong militar sa mga bayan ng Lianga, San Agustin, San Miguel, Cagwait at Tago na nagsimula noon pang huling bahagi ng Oktubre.

Nauna rito, tinakot at pinagbantaan na ng militar ang mga Manobong nakatira sa 12 barangay sa mga bayan ng Lianga at San Agustin. Bunsod ito ng mga reklamo nila sa pagdami ng mga pwersang militar mula nang pumasok ang mga kumpanyang nagmimina ng mga depositong ginto, tanso at karbon sa Andap Valley.

Ibinunyag ng mga Manobo ang pagkakampo ng mahigit 500 sundalo mula sa 58th IB sa liblib na mga barangay ng Lianga at San Agustin. Inokupa ng mga sundalo ang mga tahanan at paaralan ng komunidad. Dahil sa takot ay napilitang magbakwit ang mga residente mula noong Nobyembre 1 at pumunta sa mga sentrong bayan.

Dumating ang mga sundalo sa mga barangay ng Simowao at Emeral, Lianga noong huling bahagi ng Oktubre na at may dalang mga kanyon. Ininteroga at inilista nila ang mga pangalan ng mga mag-aaral na nasa 7 hanggang 10-taong gulang at inutusang magsumbong kung may makikita silang mga pwersa ng BHB sa lugar. Nagtayo rin sila ng mga tsekpoynt kung saan lahat ng dumadaan ay nirerekisa, inililista ang pangalan at numero ng cellphone, hinahanapan ng ID at iba pa.

Pinagbawalan din ang mga residente na lumabas sa kani-kanilang mga barangay. Pitong paaralang panliterasi ng mga lumad at isang high school sa barangay ang napilitang magsara. Tinatayang 500 mag-aaral sa elementarya at 177 sa hayskul kasama ang 27 guro ang apektado sa operasyon.

Noong Nobyembre 11, inaresto ng militar si Ritchie Enot, 19, taga-Upper Oregon, San Isidro, Lianga habang kumukuha ng yantok sa kagubatan. Pinilit ng militar na magsilbing giya si Enot at pinakawalan lamang siya matapos ang 16 na araw.

Minamanmanan ng militar ang mga kilos at gawaing pangkabuhayan ng mga residente. Pinagbawalan silang pumunta sa kani-kanilang mga bukirin at dahil dito'y may mga pamilyang isang beses na lamang kumakain sa isang araw.