REKONSENTRASYON NG LUPA SA CAGAYAN VALLEY

Pesante News
Dec. 23, 2008

Rekonsentrasyon ng lupa sa Cagayan Valley. Lumulubha

Los Angeles- Lumalala ang unti-unting rekonsentrasyon ng mga lupain sa kamay ng mga bagong tipong panginoong maylupa sa Cagayan Valley. Naiilit ang mga lupa ng mga magsasaka o kaya’y naoobliga silang magbenta nito dahil hindi na nila mabayaran ang kanilang mga inutang.

Ito ang inuulat ng isang bagong pag-aaral na nasagap ng Pesante-USA mula sa pahayagang lihim- ANG BAYAN, isyu na nailatahala nitong Disyembre 21, 2008.

Sa Isabela, patuloy na binabawi ang CLOA ng mga magsasaka sa 13,085-ektaryang Hacienda San Antonio-Santa Isabel. Itinakda ito noong 2007 para bigyang-daan ang proyekto ng San Miguel Corporation na pagpapatanim ng kamoteng kahoy.

Maalalang ipinaglaban ng mga magsasaka ng dalawang asyenda ng kanilang karapayan sa lupa mula noong 1979 hanggang 1982 kaya napilitang ipailalim sa “land reform” ng diktador Marcos ang dalawang hacienda noong 1982.

Subalit sa ilalim ng rehimeng US-Arroyo, muling inangkin nina Cojuanco at ng San Miguel Corporation and dalawang hacienda at ibang lupain sa Cauyan, Tumauini at Ilagan.

Problema sa Lupa, pinalala ng usura

Ayon sa ulat, nagpapaligsahan sa pang-aagaw ng mga lupa ang malalaking usurero-komersyante, at kahit yaong maliliit na nagpapautang na karamihan ay mga garantor sa mga baryo. Ang mga usurero-komersyante ang siyang nagpapalaganap ng mga tanim na nakaasa sa abono at pestisidyo, naniningil ng mataas na upa sa lupa at input sa pagsasaka habang pinananatiling mababa ang presyo ng mga produkto.

Higit na pinabibigat ng maliliit na usurero na kinakatawan ng mga garantor sa baryo (karaniwan ay mayayamang magsasaka at ilang mataas na panggitna) ang pautang sa pamamagitan ng patong na 5-15% bawat tagtanim at pagpapataw ng compounded na interes (ibig sabihin, ang pagkwenta ng kabuuang utang ay ibinabatay sa pinagsamang halaga ng prinsipal at interes na hindi pa nababayaran).Obligado rin silang sa garantor magpagiik at magpahakot ng produkto, at magtrabaho sa lupain ng garantor.

Bunga nito, kadalasang naiilit ang lupa kapwa ng mga panggitna at maralitang magsasaka. Kasabay ito ng pag-ilit sa lupain ng mga dati nang nakapaloob sa PD 27, CARP, at programang stewardship ng reaksyunaryong gubyerno.

Matabang lupa sa paglaban ng magsasaka ang mga proyekto ng gubyerno’t kasabwat nila na mapang-agaw at mapagsamantala. Tuluy-tuloy ang paglaban ng masang magsasaka sa Cagayan Valley upang igiit ang karapatan sa lupang ikinabubuhay.

*****