WALANG AWAT NA KILOS PROTESTA SA PILIPINAS

by Pesante-USA Wednesday, Jul. 23, 2008 at 6:25 AM
magsasakapil@hotmail.com 213-241-0906 337 Glendale Blvd. Los Angeles, CA 90026

Sunud-sunod na kilos-protesta ang inilunsad nitong nagdaang mga araw, laluna ng mga kabataan, laban sa tuluy-tuloy na pagtaas ng presyo ng mga produktong petrolyo at sa pagtanggi ng rehimeng Arroyo na alisin ang ipinapataw nitong buwis sa mga ito. Papalaki at papadalas na mga kilos-protesta ng mga kabataan. Umabot sa mahigit 5,000 estudyante at kabataang di nakapag-aaral ang nagmartsa patungong Mendiola nitong Hulyo 18. Sa panawagang “Kabataan at Bayan, Mag-aklas,” nag-walkout ang libu-libong estudyante mula sa kani-kanilang eskwelahan. Iginiit nila ang pagbabasura sa value added tax (VAT) sa langis, ang pagbabasura sa Oil Deregulation Law at ang pagsasabatas sa P125 across-the-board na umento sa sahod.

Tugon sa walang-awat na pagtaas ng presyo ng langis :

Walang-awat na mga kilos-protesta sa Pilipinas


Manila- Sunud-sunod na kilos-protesta ang inilunsad nitong nagdaang mga araw, laluna ng mga kabataan, laban sa tuluy-tuloy na pagtaas ng presyo ng mga produktong petrolyo at sa pagtanggi ng rehimeng Arroyo na alisin ang ipinapataw nitong buwis sa mga ito.

Papalaki at papadalas na mga kilos-protesta ng mga kabataan. Umabot sa mahigit 5,000 estudyante at kabataang di nakapag-aaral ang nagmartsa patungong Mendiola nitong Hulyo 18. Sa panawagang “Kabataan at Bayan, Mag-aklas,” nag-walkout ang libu-libong estudyante mula sa kani-kanilang eskwelahan. Iginiit nila ang pagbabasura sa value added tax (VAT) sa langis, ang pagbabasura sa Oil Deregulation Law at ang pagsasabatas sa P125 across-the-board na umento sa sahod.

Malayo pa sila sa Mendiola ay hinarang na sila ng mga pulis. Tumungo sila sa Mehan Garden at doon naglunsad ng programa. Kabilang sa programa ang mga dulang kalye at mga awitin. Nagsagawa ng alternatibong paaralan sa lansangan ang mga estudyante kung saan pinag-aralan ang bulok na sistema ng lipunang Pilipino.

Kasabay ding naglunsad ng pagkilos ang mga estudyante sa mga unibersidad sa Baguio City, Cebu City, Davao City, Negros Occidental at Negros Oriental. Sa Baguio City, umabot sa 1,000 estudyante na pawang nakapula ang nagmartsa sa mga kalsada. Nagawa nilang makapagtipon sa Malcolm Square sa kabila ng malakas na buhos ng ulan at ng tatlong tangkang panghaharang ng mga pulis sa Session Road at Magsaysay Avenue.

Ang demonstrasyong ito ang ikalawang malaking kilos-protesta ng mga kabataan sa loob ng sampung araw. Noong Hulyo 10, na idineklarang National Youth Action Day, libu-libo ring estudyante ang nag-walkout sa mga klase sa pangunguna ng Youth for Truth and Accountability Now (Youth Act Now) at ng mga myembrong organisasyon nito tulad ng Anakbayan, League of Filipino Students, Student Christian Movement, Kabataang Pinoy, Youth Revolt, National Union of Students in the Philippines at College Editors Guild of the Philippines.

Lumahok ang libu-libong estudyante ng University of the Philippines, Polytechnic University of the Philippines, Philippine Christian University at Adamson University. Lumahok din sa mga pagkilos ang mga estudyante mula sa Ateneo de Manila, De La Salle University at University of Santo Tomas, gayundin ang mga mag-aaral mula sa Jose Rizal University, Lyceum of the Philippines, University of the East-Manila, pati na ang mga estudyante mula sa Sauyo, Culiat at Quirino High School. Nagkaroon sila ng programa at iba pang aktibidad sa kani-kanilang eskwelahan bago magtipon sa España Avenue sa Maynila at magmartsa patungong Mendiola Bridge (Don Chino Roces Bridge ngayon). Ang iba namang mga estudyante ay nagtipon sa tapat ng University of Santo Tomas sa España. Sinunog nila ang isang effigy ni Arroyo.

Hinarang ng mga pulis ang mga estudyante sa Mendiola kaya sa Morayta Avenue sila nagdaos ng programa.

Noon namang Hulyo 3, umabot sa 3,000 estudyante ng Polytechnic University of the Philippines (PUP) ang nag-walkout mula sa kani-kanilang mga klase at nagmartsa patungong Mendiola. Isang linggo bago ito, napilitan ang administrasyon ng PUP na isauli sa mga estudyante ang dating siningil nitong P250 na developmental fee matapos magmartsa ang halos 2,000 estudyante sa upisina ng Commission on Higher Education sa Pasig City.

Nag-aalimpuyong mga protesta sa mga upisina ng kumpanya ng langis. Sunud-sunod na mga protesta ang inilunsad ng mga manggagawa at iba pang sektor sa tapat ng mga upisina ng mga kumpanya ng langis upang ipakita ang matinding galit ng mamamayan sa sunud-sunod na pagtaas ng presyo ng mga produktong langis.

Sinugod at binarikadahan noong Hulyo 14 ng mga myembro ng mga progresibong organisasyon sa pangunguna ng Bagong Alyansang Makabayan (BAYAN) ang upisina ng Pilipinas Shell sa Valero Street, Salcedo Village, Makati City. Lumahok din sa kilos-protesta ang mga kasapi ng Anakbayan, Kilusang Mayo Uno, Migrante at iba pang mga organisasyon. Pinagbabato nila ng pintura at pinintahan ang pader ng gusali ng Shell ng mga mensaheng tulad ng "Oust Gloria" at "No to oil price hikes." Tinangkang harangin ng mga gwardya ng Shell ang mga nagpoprotesta. Tumagal nang ilang minuto ang protesta.

Noong Hulyo 11 naman, nilusob ng mga estudyante sa pangunguna ng Anakbayan ang pangunahing upisina ng Petron Corp. sa Gil Puyat Avenue sa Makati City. Pinagbabato nila ng grasa ang upisina ng Petron. Partikular na daing ng mga estudyante ang hirap na dinaranas ng kanilang mga magulang upang makaagapay sa lalong tumataas na presyo ng mga bilihin dulot ng hindi maawat na pagtaas ng presyo ng mga produktong petrolyo.

Noong Hulyo 5, binato ng kamatis ng mga kasapi ng BAYAN ang upisina ng Pilipinas Shell sa Makati City upang tutulan ang panibagong pagtataas ng presyo ng langis noong araw na iyon.

Kumakalat na protesta sa buong bansa. Noon ding Hulyo 11, inilunsad ang 18 araw na protestang caravan sa pangunguna ng Anakbayan-Southern Tagalog mula sa Los Baños, Laguna. Kasama sa caravan ang Southern Tagalog Cultural Network at iba pang organisasyon ng kabataan. Dala-dala ng caravan ang mga isyu ng mataas na matrikula, presyo ng mga produktong petrolyo at ng mga bilihin tulad ng bigas.

Nakatakdang dumaan ang caravan sa Rizal, Quezon at Batangas upang manghimok ng mas marami pang kabataan na sumali sa protesta. Nakatakdang magtapos ang caravan sa Quezon City sa Hulyo 28 kung saan sasama sila sa iba pang organisasyon sa protesta sa araw ng State of the Nation Address ni Gloria Arroyo.

Samantala, inilunsad ngayong buwan ang isang signature campaign para ibasura ang Oil Deregulation Law at ang VAT sa mga produktong petrolyo. Umiikot ang kampanya sa mga terminal ng dyip at traysikel iba pang pampublikong lugar.

Sa Legazpi City, isinasagawa ang lingguhang noise barrage sa pangunguna ng mga progresibong organisasyon laban sa walang patid na pagtaas ng presyo ng langis.