Paglabag sa Karapatang Pantao, lalong Lumulubha

Paglabag sa Karapatang Pantao, lalong Lumulubha

Los Angeles-- Mariing konondena ngayon ng Alyansa Pilipinas (AJLPP) ang patuloy at papatinding paglabag sa mga karapatang pantao sa Pilipinas noong bago at matapos ang eleksyong Mayo 14.

Ayon sa mga nakalap na ulat ng AJLPP, tatlong myembro ng mga progresibong partido ang pinaslang kaugnay ng nakaraang eleksyon sa Camarines Norte at Iloilo. Apat naman mga myembro ng militanteng grupong magsasaka an pinatay sa Agusan del Sur at Negros Occidental Pinaslang din ng mga sundalo at sinalaula ang mg bangkay ng isang mag-ina sa Agusan del Sur.

Ang mga krimen ay naganap sa panahon ng kampanya at maging matapos ang eleksyon ay nagpapatunay lamang sa pagiging halimaw na pasista ng rehimeng US-Arroyo. Naririto ang mga detalye ng mga balita:

Mayo 16. Natagpuang patay sina Jun Bagasbas, 20, at Ronilo Vallevare, 16, sa pagitan ng Barangay Matague at Cabataguangan sa Capalonga, Camarines Norte. Sina Bagasbas at Vallevare, mga organisador at poll watcher ng Kabataan Party, ay dinukot ng mga pinaghihinalaang sundalo noong gabi ng Mayo 15.

Mayo 14. Binaril ng mga elemento ng death squad si Melbert Camariosa, 32, habang papauwi siya mula sa katatapos na canvassing ng mga boto ng mga kandidato sa Igdampog Sur Primary School, Igdampog Sur, Tubungan, Iloilo. Tinamaan si Camariosa sa dibdib at hindi na nakaabot nang buhay sa ospital. Maliban sa pagiging kasapi ng konseho ng barangay, siya ay aktibong kasapi ng Bayan Muna (BM) at tagapangampanya ng isang kandidato sa pagkaalkalde sa Tubungan.

Mayo 5. Pinatay ng mga berdugong militar ni Arroyo si Jorge Dinolan, 40, myembro ng Nagkahiusang Mag-uuma sa Agusan del Sur-KMP sa bayan ng Loreto, Agusan del Sur. Umalis si Dinolan sa kanilang bahay noong Mayo 4 at hindi na nakauwi. Kinabukasan, nakita na lamang ang kanyang bangkay malapit sa ilog ng Umayam. Bukod sa tama sa ulo, nagtamo rin ang biktima ng maraming pasa sa katawan.

Mayo 5 hanggang sa kasalukuyan. Tatlong magsasaka ang walang awang minasaker ng nag-ooperasyong mga elemento ng 11th IB sa Sityo Malipayon, Barangay Sibucauan, Isabela, Negros Occidental. Ang mga biktima ay sina Benjamin Gellonga, 72; Richard Sarillo, 28; at Bobby Quilo, 20. Lahat sila ay mga sibilyan na taga-Upper Coyaoyao, Barangay Inulingan sa kanugnog na bayan ng Moises Padilla at pawang mga myembro ng Barangay Inulingan Farmers Association (BIFAD), isa sa mga alyadong organisasyon ng Kilusang Magbubukid ng Pilipinas (KMP). Ngunit ipinrisinta sila sa midya ni Lt. Col. Jess Mananquil, kumander ng 11th IB, bilang mga kasapi ng BHB.

Bunga ng karumal-dumal na krimen, halos 1,000 katao ang lumikas sa kanilang mga tahanan at pansamantalang nakatira sa mga paaralan at kapilya ng mga bayan ng Moises Padilla at Isabela. Dahil sa hirap ng kalagayan sa mga sentro ng ebakwasyon ay namatay ang 84 taong gulang na si Sotero Aborado.

Dumarami pa ang mga karumaldumal na krimen laban sa mga karapatang pantao ng rehimeng_US-Arroyo, ang utang nito sa dugo laban sa mga mamamayan ay lalo pang dumarami at hindi makakalimutan ng masa para sa araw ng pagtutuos.

**********