Rehimeng US-Arroyo, nanguupat at naghahanda ng Gyera sa Mindanao.

Rehimeng US-Arroyo, nanguupat at naghahanda ng Gyera sa Mindanao.

Manila-- Patuloy na ipinakikita ng reaksyunaryong gubyerno, laluna ng rehimeng Arroyo, na hindi ito interesadong kamtin ang tunay na kapayapaan para sa mamamayang Moro. Ang tanging interes ng rehimen ay sumuko at magbaba ng armas ang MILF.

Noong nakaraang mga linggo, sunud-sunod na mga bomba ang sumabog sa Mindanao at kasabay nito wala pa ring tigil ang operasyong military laking dibisyon sa isla ng Sulu laban daw sa Abu Sayaff. Sinundan ito ng paghahabla ng gobyerno ng salang pambomba laban sa mga lider ng MILF sa Korte. Mga hakbang na patunay na sinasabotahe nito ang usapang pangkapayapaan.

Nauna rito, buong pagmamalaking ibinalita ng AFP na binuo na nito ang dalawang hiwalay na kumand ng AFP sa Mindanao mula sa dating pinakamalaking kumand ng AFP- ang Southern Command (SOUTHCOM). Binuo nila ang Eastern Mindanao Command (EasMinCom) na “haharap sa banta ng NPA” at ang Western Mindanao Command (WesMinCom) na “haharap sa banta ng mga Muslim Seccesionist.”

Kaugnay nito binuo nila ang dalawang dagdag na dibisyon ng AFP- ang 9th at 10th Division ng Armi at ipinailalim ito sa bagong buong dalawang command. Kasabay nito ang bagong 12 batalyon ay pinasasanay sa ilalim ng mga adviser na Amerikano katulad ng pagsasanay nito sa mga batalyong anti-komunista noon sa El Salvador.

Kasaysayan ng pananabotahe

Mula't sapul. Sinimulan ang usapang pangkapayapaan noong 1997 sa ilalim ng rehimeng Ramos. Sa loob ng dalawang taon, nabuo ang mga mayor na kasunduan kabilang ang General Agreement for Cessation of Hostilities (1997), ang General Framework of Agreement of Intent (1998) at ang kasunduan para sa pagbubukas ng pormal na negosasyon (1999). Subalit sarisaring balakid ang inihaharang ng GRP sa bawat pihit ng usapan.
Sa mismong pagbubukas ng pormal na negosasyon, naglunsad ang AFP ng panibago at mas malalaking operasyong militar sa mga teritoryo ng MILF. Mula sa 17 batalyong nakatuon sa MILF noong 1999, idinagdag ng AFP rito ang 25th, 39th at 40th IB, Philippine Marines at Scout Rangers ng 6th Infantry Division na nakabase sa Maguindanao; ang 41st at 81st IB sa ilalim ng 4th ID na nakabase sa Cagayan de Oro City; at isang contingent mula sa 301st Brigade sa ilalim ng 3rd ID na nakabase sa Visayas.

Todo Gera I.

Noong 2000, sa utos ng noo'y presidente Joseph Estrada, sinalakay ng AFP ang Camp Abubakar, ang pangunahing himpilan ng MILF sa kabila ng umiiral noong tigil-putukan at kahit pa katatapos lamang sumang-ayon ng GRP sa kasunduan kaugnay sa pag-atras ng mga pwersa ng MILF sa mga teritoryo nito. Hindi pa man nakakabwelo, gumuho na ang usapang pangkapayapaan. Sa loob ng sumunod na mga buwan, walang awat ang mga pagsalakay ng AFP sa mga teritoryo ng MILF.
Mahigit 400,000 mamamayang Moro ang napilitang lumikas mula sa kanilang mga komunidad bunga ng todo-gera laban sa MILF.
Dahil dito, nagpasya ang pamunuan ng MILF na magdeklara ng jihad o "banal na gera" laban sa rehimeng Estrada noong Setyembre 2000. Nasa kasagsagan ang naturang jihad nang mapatalsik si Estrada noong Enero 2001.

Sa kabila nito hindi pa rin nagbago ang kalagayan at nagpatuloy ang pag-atake ng AFP laban sa mga mamamayang Moro. Nagkaroon lamang ng bahagyang paghupa ng operasyon at pansamantalang kapayapaan sa Mindanao.

Usapang pangkapayapaan. Noong 2001, nagkasundo ang MILF at rehimeng Arroyo na muling buksan ang pormal na usapan. Nagdeklara ang MILF ng suspensyon ng mga operasyong militar. Nabuo noong Hunyo sa Tripoli, Libya ang Kasunduan para sa Kapayapaan sa pagitan ng GRP at MILF, na mas nakilala bilang MILF-GRP Tripoli Agreement on Peace of 2001.

Nakasaad sa naturang kasunduan ang mga substantibong adyenda ng negosasyon kabilang ang tungkol sa 1) aspetong panseguridad o tigil-putukan; 2) rehabilitasyon at pagpapaunlad ng mga lugar na nawasak dahil sa militarisasyon; at 3) lupang ninuno.

Nabuo ang kasunduan ukol sa unang dalawang adyenda. Subalit mula noon ay wala pang nabubuong kasunduan ukol sa usapin ng lupang ninuno, ang pinakaubod ng pakikibaka ng mamamayang Moro. Mula 2003 ay ginagawa na ng rehimeng Arroyo ang lahat ng paraan upang ipagpaliban o isaisantabi ang pag-adyenda rito habang iniiwasan nitong mawalan ng bisa ang iba pang kasunduan, laluna yaong hinggil sa tigil-putukan.

Todo Gera II sa kabila ng Usapan ng 2001

Bago pa man magsimula ang ikatlong adyenda noong Pebrero 2003, nagtambak na ang rehimen ng ilandaang tropa sa paligid ng Liguasan Marsh. Mula rito, naglunsad ng malawakang operasyon ang AFP sa mga baryo ng Cotabato at Maguindanao. Unti-unting dinagdagan ng AFP ang mga tropa nitong nakadeploy sa Pikit, North Cotabato noong unang linggo ng Pebrero.

Noong Pebrero 11, sa kabila ng kasunduan para sa tigil-putukan at ng nakatakdang pormal na pag-uusap sa araw na iyon, nagsagawa ng malawakan at walang pakundangang pambobomba ang mga pwersa ng AFP sa Rajahmuda at Buliok sa bayan ng Pikit. Umabot sa 20,000 sibilyang Moro ang napilitang lumikas. Marami ang namatay at mas marami pa ang nasugatan.

Upang muling masabotahe ang usapan, isinagawa ng rehimeng Arroyo ang pambobomba sa Sasa Wharf at Davao International Airport noong Abril 2003 (bagay na pinatotohanan ng mga sundalong lumahok sa Oakwood Mutiny).

Pinalalabas noon ng rehimeng Arroyo na ang mga pambobombang iyon ay gawa ng MILF. Muling nagdeklara ang GRP ng todo-gera laban sa MILF, karakarakang kinasuhan ang mga upisyal nito at inilabas ang kautusang arestuhin ang noo'y tagapangulo nitong si Hashim Salamat at ang buo nitong Komite Sentral. Muling gumuho ang pormal na usapan.

Usapin Hinggil sa mga Lupang ninuno.

Pagsapit ng Disyembre 2004, dumating sa Pilipinas ang International Monitoring Team na binubuo ng mga kinatawan mula sa mga bansang kasapi ng Organization of Islamic Conference. Dahil dito, bahagyang naglubay ang AFP sa mga paglabag nito sa tigil-putukan at sa karapatang-tao ng mamamayang Moro. Binigyang-daan din nito ang pagtalakay sa usapin ng lupang ninuno ng mga Moro.

Subalit mula noon ay matagal na uminog ang usapan sa pagmamatigas ng GRP kaugnay ng usapin ng lupang ninuno. Tuwing may natatapos na kahit mababang antas ng talakayan tungkol sa usaping ito, pinalalabas ng Malakanyang na may “malaking breyktru” na nakamit sa usapang pangkapayapaan. Lumabas ang katotohanan hinggil sa pagbagsak ng usapan matapos ang ika-13 exploratory talks nitong Setyembre 7.

Nagpahayag na ang MILF na sila ay handa sa pagsiklab ng anumang gyera na itutulak ng Rehimeng Arroyo. Nagkakamali ang Rehimeng Arroyo kung sa kanilang palagay kaya nilang pagsabayin ang kanilang todo-gyera laban sa NPA at ang todo gyerang ikakasa nila laban sa mamamayang Moro sa pang-uupat ng Imperyalismong US.

Sa ngayon todo ang propaganda ng gobyerno kapwa laban sa NPA at sa MILF na ang diumano may sabwatan ang MILF sa Abu Sayaff at sa Jemmayah Islamiya. Anuman ang kahihinatnan ng paghahanda sa gyera ng gobyerno, gumagawa lamang ito ng gulo at sa huli magbabagsak ng mabigat na bato sa sariling paa nito kapag itinodo nito ang gyera laban sa mamamayan ng Mindanao.

*****