PATULOY ANG ATAKE NG REHIMENG-US ARROYO AT AFP SA MASA

by Philippine Peasant Support Network(Pesante) Saturday, Sep. 23, 2006 at 2:21 PM
magsasakapil@hotmail.com 213-241-0906 337 Glendale Ave. Los Angeles, CA 90026

Sa kabila ng pakunwaring mga pahayag ni Gloria Arroyo, walang tigil at di-maawat ang mga pamamaslang, pagdukot, tortyur, iligal na pag-aresto at detensyon at iba pang karumal-dumal na paglabag ng mga armadong galamay ng estado sa karapatang-tao ng mamamayan. Mahigpit na kinokondena at iginigiit ng Pesante-USA na dapat nang matigil ang amahas na pamamasista at terorismo ng estado. Lalo lamang pinagagalit ni GMA ang masa at hinuhukay ang sarili nitong libingan tulad ng nangyari kina Marcos at Estrada. Umabot na sa mahigit 755 ang pinaslang at may 188 ang nawawalang aktibista na hindi matagpuan. Papalubha ang mga paglabag sa karapatang pantao na malapit nang maungusan ni Gloria-Arroyo.ang pagiging garapal na pasista ni Marcos ayon sa Pesante-USA Patuloy Ang Atake ng Rehimeng US-Arroyo at AFP sa Masa: Tumitindi, Paglabag sa Karapatang-Tao

PATULOY ANG ATAKE NG REHIMENG-US ARROYO AT AFP SA MASA

Maynila – Sa kabila ng pakunwaring mga pahayag ni Gloria Arroyo, walang tigil at di-maawat ang mga pamamaslang, pagdukot, tortyur, iligal na pag-aresto at detensyon at iba pang karumal-dumal na paglabag ng mga armadong galamay ng estado sa karapatang-tao ng mamamayan.

Mahigpit na kinokondena at iginigiit ng Pesante-USA na dapat nang matigil ang amahas na pamamasista at terorismo ng estado. Lalo lamang pinagagalit ni GMA ang masa at hinuhukay ang sarili nitong libingan tulad ng nangyari kina Marcos at Estrada.

Umabot na sa mahigit 755 ang pinaslang at may 188 ang nawawalang aktibista na hindi matagpuan. Papalubha ang mga paglabag sa karapatang pantao na malapit nang maungusan ni Gloria Arroyo ang pagiging garapal na pasista ni Marcos ayon sa Pesante-USA

Dahil ditto, mahigpit na kinokondena ng Pesante-USA ang mga paglabag sa karapatng pantao na isinasagwa ng AFP. Halos walang araw na lumilipas na walang bagong kaso ng pang-aabusong militar. Sumusunod ang pinakahuling naitalang mga kaso:

Setyembre 16. Pinagbabaril ng 11 lalaking nakabonete at naka-combat boots si Christopher Lunar, 31, lider magsasaka at municipal coordinator ng partidong Anakpawis sa bayan ng Del Gallego, Camarines Sur. Naglilinis siya ng kanyang bakuran sa Barangay Sta. Rita II sa Del Gallego nang paligiran ang kanyang bahay ng mga lalaking armado ng mga .45 kal pistola. Si Lunar ang ika-33 myembro ng Anakpawis na pinaslang ng mga death squad ng rehimeng Arroyo.

Noong araw ding iyon, pinaslang ng apat na armadong lalaki si Pablito Glean, chief security officer ng oposisyunistang meyor na si Jejomar Binay ng Makati City. Pinagbabaril si Glean habang nagkakape kasama ng kanyang mga kaibigan sa isang tindahan sa Taguig City.

Napatay din ang isang security guard at nasugatan ang tatlong kaibigan ni Glean sa pamamaril. Kabubunyag lang ni Glean noong Agosto sa "Operation Phoenix," isang pakana ng Malakanyang para targetin na rin ng pampulitikang pamamaslang ang mga oposisyunistang anti-Arroyo.

Setyembre 15. Tatlong myembro ng partidong Anakpawis ang dinampot sa kani-kanilang mga bahay sa Sityo Sabitan, Barangay Santo Rosario, Malolos City. Ibinimbin at ininteroga sila nang 20 oras tungkol sa presensya umano ng Bagong Hukbong Bayan (BHB) sa kanilang barangay. Ang iligal na pag-aresto kina Francisco Nicodemus, Emmanuel Maceda at Sonny Rodante Cabague ang unang naitalang paglabag sa karapatang-tao sa ilalim ng panunungkulan ni Maj. Gen. Juanito Gomez, ang pumalit kay Maj. Gen. Jovito Palparan na nagretiro bilang hepe ng 7th ID nitong Setyembre 11.

Sa San Marcelino, Zambales ang tatlong minoryang agsasakang sina Nelson Mallari, Nardo Serrano at Andres Dacanay—pawang mga lider ng Central Luzon Aeta Association ang inaresto ng military. . Dinampot sila nang mapadaan sa tsekpoynt at walang maipakitang sedula. Ibinimbin sila ng pulisya sa Castillejos, Zambales at pinakawalan lamang nang magreklamo ang Kilusang Magbubukid ng Pilipinas.

Setyembre 13. Malubhang nasugatan si Joseph Domingo sa Sityo Mathay, Barangay Tuyo, Balanga City, Bataan bandang alas-7 ng umaga matapos siya akusahang kasapi ng BHB at pagbabarilin ni PO2 Leonardo Boy Tan, isang elemento ng PNP Special Action Force.

Noong araw ding iyon, iligal na dinakip ng mga elemento ng RPA-ABB sa Sityo Bato-Bato, Barangay Tabun-ac, Toboso, Negros Occidental ang sampung myembro ng Teatro Obrero, grupong pangkultura ng National Federation of Sugar Workers. Maghapong hinawakan at pinagpasa-pasahan ng RPA-ABB, Philippine Army at pulisya ng Toboso ang sampung aktibistang pangkultura bago pinakawalan. Inakusahan silang mga bagong rekrut ng BHB. Nagpunta sila sa Toboso para mag-ensayo para sa isang street play na ipalalabas nila sa anibersaryo ng Escalante Massacre sa Setyembre 21.

Setyembre 12. Pinagbabaril ng dalawang nakamotorsiklong lalaki sa Calamba, Laguna bandang alas-12:30 ng hapon si Nemesio Aquino, presidente ng JAM Liner Employees Union-National Federation of Labor Unions.

Kalalabas lamang niya sa regional office ng Department of Labor and Employment kung saan siya dumalo sa bista ng kaso ng kanilang unyon nang siya’y paulanan ng bala. Namatay ang biktima mahigit isang oras matapos siya dalhin sa ospital dahil sa dalawang tama ng baril sa kanyang likod.

Samantala, sa Mauban, Quezon, dinukot ng mga pinaghihinalaang elemento ng militar si Marco Ferdinand, Bayan Muna coordinator sa bayang iyon. Si Ferdinand ay pinagbibintangan ng militar na myembro ng BHB.

Setyembre 11. Sinalbeyds ng mga tropa ng 19th IB ang hors de combat na si Bibiano Rentillosa, kalihim ng Northern Leyte Front. Naliligo si Rentillosa nang masukol siya ng mga sundalo sa Barangay Libertad, Kananga, Leyte. Dahil hindi siya armado ay hindi nanlaban si Rentillosa. Ayon sa mga nakasaksing tagabaryo, nakita nilang buhay at walang sugat na dinakip si Rentillosa.

Subalit di nagtagal ay ibinalita ng militar na namatay siya umano sa isang engkwentro kasama ng tatlo pang Pulang mandirigma. Pinabulaanan ng National Democratic Front sa rehiyon na nagkaroon ng engkwentro. Wala rin anitong ibang namatay na mga gerilya at wala ring nakuhang armas o dokumento kay Rentillosa.

Setyembre 10. Dinukot ng mga elemento ng 74th IB sa Barangay Buenavista, San Narciso, Quezon sina Midwen Hiwatig, 26 at Jovito Marco, 23 bandang ala-una ng madaling araw. Dinala ang dalawang magsasaka sa Camp Nakar sa Lucena City pero nang hanapin doon ni Flordeliza Hiwatig, ina ni Midwen ay sinabi ng militar na wala sa kanila ang mga ito.

Setyembre 7. Natagpuan ang bangkay ni Napoleon Bautista sa Calumpit, Bulacan pitong araw matapos siya dukutin ng mga sundalo sa kanilang bahay sa Barangay San Roque, Hagonoy, Bulacan kasama ng kanyang asawang si Ofelia. Parehong kasapi ng Anakpawis-Hagonoy ang mag-asawa. Pinakawalan noong Agosto 31 ang bugbog-saradong si Ofelia. Si Napoleon naman ay halos hindi na makilala nang matagpuan ang kanyang bangkay dahil basag ang kanyang mukha. Tinapyas din ang isa niyang tainga at marami siyang saksak sa buong katawan.

Samantala, pinaslang sa Barangay Cantubod, Danao, Bohol ng dalawang lalaking nakamotorsiklo si Victor Olayvar, 41, provincial coordinator ng Bayan Muna (BM) at upisyal ng Hugpong sa mga Mag-uumang Bol-anon (HUMABOL). Si Olayvar ay isa sa apat na lider ng HUMABOL na target ng asasinasyon ng 302nd IBde. Ang tatlo pa ay sina Felipeneri Bejasa, vice chairman ng HUMABOL; William "Boy" Banting, chairman ng HUMABOL; at Thomasa Santos, tagapangulo ng HUMABOL sa Alicia, Bohol.

Noong araw ding iyon, pinagbabaril hanggang sa mapatay ng mga nakamotorsiklong lalaki sina Konsehal Roberto Victoria at asawa niyang si Shirley bandang alas-5:30 ng umaga sa Pulilan, Bulacan. Aktibong sumusuporta ang mag-asawa sa laban ng mga magsasaka sa Hacienda Meñez sa bayang iyon.

Samantala, sa Barangay San Jose, Hagonoy, Bulacan ay dinukot ng mga armadong lalaki sina Roderick John Cruz at Marvin Verano at pwersahang isinakay sa isang owner-type na dyip.

Setyembre 4. Pinagbabaril hanggang sa mapatay ng pitong armadong lalaki si Ranbert "Alvin" Placencia, municipal coordinator ng partidong Anakpawis sa Mawab, Compostela Valley, tserman ng Nuevo Iloco Farmers Association at council member ng Nagkahiusang Mag-uuma sa Mawab. Si Placencia, na ninakawan din ng kanyang bag at cellphone, ay pinaslang matapos sitahin ng mga salarin ang sinasakyan niyang motorsiklo sa Purok 8, Sta. Monica, Nuevo Iloco, Mawab. Siya ang ika-77 biktima ng pampulitikang pamamaslang sa Southern Mindanao.

Original: PATULOY ANG ATAKE NG REHIMENG-US ARROYO AT AFP SA MASA